500 Jahre Pfarrei Daisbach

Urkunde > 1501 < zur Errichtung einer selbständigen Pfarrei

Ich Mathis Ramung zu Daspach und wir die ganze gemeynde daselbst Bekennen unnd thun kunt allen denen die diesen brieff sehen oder hören lesen Als wir got dem almechtigen Maria seiner mutter unnd allem hymelischen Heer zu lobe unnd Eer unnd wem er unnsern vorfaren unnd nachkomenden als heyl und nutz wollen mit gunst und verwilligung unnd Sonderlicher Hilff unnd gnade des hochwirdigen Ime gott vatters und herren Herrn Johannes Bischoffe zu worms unnsers gnedigen Herrn Auch mit willen und wissen des Ersamen Herrn Heynrich Stock pfarrers der pfarrkirchen Zu Neydensteyn In die das dorff Daspach bissher gepfarrt hatt Ein Neuer pfarr und pfarrkirche gestifft unnd gemacht haben. Als das nun hierbey zu Ewigen Zeyten Ein pfarr zu daspach sein und pleyben unnd gantz von der mutterkirchen zu Neydensteyn abgeschieden sein soll Nach bitt unnd Innhalt eines versiegelten brieffs des obgütl unnsers gnedigen herren Herrn Johannes  Bischoffs zu worms damalen gemacht und übergebenn Alß darob nun das dorff Daspach biss her von Neydensteyn Inn die pfarr und mutterkirchen gehört und gepfarrt hat und fürbass .....  darinn pfarrer zwecken hierfür zu Ewigen Zeyten darvon abgescheyden sein soll.

So versprechen unnd geloben Ich mathis Ramung obgemelt als lehenher der Newen pfarr Auch wie der pfarrherr kirchengeschworenen Unnd gantze gemeynde des obgenannten dorffs Daspach für unns unnd alle unnsere Erben unnd Nachkomen mit warheyt unnd guten treuen inn Kraft dies brieffs Das von hetzund und fürbars zu ewigl Zeyten kein forderung oder anspruch an den obgedachten Herr Heynrichen pfarrer zu Neydensteyn oder seym nachkomen schon haben sollen oder wollen oder schaffen gethan worden Wen solches genant mecht sein Sonndern der dort gemelt Pfarrer zu Neydensteyn oder Seyn Nachkomen Sollen der gemelten Newen pfarr halben  gar unnd gantz unbekümert auch von unns unnd unnsern Nachkomen unnd ewiglichem seyn unnd beleyben, Es soll auch ein jeglicher pfarrer zu Neydenstein an allen und jeglichen Zinsen gütern unnd Zehenden gros und klein so er bis her Zu daspach gehapt hatt hinfür Ewigliche messen und vor gentzlich ungehindert und unbeschedigt beley-ben ........  sollen auch dem vielgemelten pfarrer zu Neydenstein ein gebürlich und zimlich .........  für der darauff und dann gewönlich ist  Inn dem Stuffe zu waren als deren ein andere Newen pfarrer biss her gehalten ist worden. Doch sollen jegliche zufellig opffer Seelgered und anders das von pfarrer zu Neydenstein bis her mit Seyner arbeyt zu Daspach gehapt hat für hin erhalten und bleyben zu ewigen Zeyten Eyne jeglichen pfarrer zu Daspach Nach Innhalt unnd weisung  unnsers gnedigen Herr von Worms Confirmation auch alles zu urkunde unnd merer Sicherheit.

So hab Ich Mathis Ramung obgemelt aygen meyn angeborn Inngesiegel für mich und denen armen leut zu daspach öffentlich an diesen brieff thun hencken … unnd alle meyne Erben auch denen armen leut ir erben unnd nachkomen obgeschriebene Dinge damit zu besorgen.

Das geben ist uff mittwoch nebst Nach dem Sontag Judica Inn dem Jarr als man Zält nach Christus unsers

lieben Herren geburt Dusend fünff hundert und ein Jare.\ (1501)

 

6.1.2001 Emil Schumacher/Reinhard Stichling                                                                                          10-120.doc